Test revolucionar gjaku zbulon mbi 50 lloje kanceri në fazë të hershme
Një test gjaku që mund të identifikojë më shumë se 50 lloje të ndryshme të kancerit po shihet si një hap i madh drejt diagnostikimit të hershëm dhe trajtimit më të suksesshëm të sëmundjes.
Rezultatet e një studimi të ri në Amerikën e Veriut treguan se testi Galleri, i zhvilluar nga kompania amerikane Grail, ishte në gjendje të zbulonte një gamë të gjerë kanceresh — përfshirë ato që aktualisht nuk kanë programe skriningu, si kanceri i vezoreve, mëlçisë, stomakut, fshikëzës dhe pankreasit, raporton BBC.
Sipas studimit, më shumë se gjysma e rasteve me kancer u zbuluan në fazë të hershme, kur trajtimi është më i lehtë dhe shanset për shërim janë më të mëdha. Testi zbulon fragmente të ADN-së kanceroze që qarkullojnë në gjak, duke i identifikuar përmes analizës së thelluar gjenetike.
Në provën që përfshiu 25,000 persona nga SHBA dhe Kanadaja, gati një në 100 pati rezultat pozitiv, dhe për 62% të tyre, diagnoza e kancerit u konfirmua më vonë.
Hulumtuesja kryesore, Dr. Nima Nabavizadeh, nga Universiteti i Shëndetit dhe Shkencës në Oregon, deklaroi se këto të dhëna mund të “ndryshojnë rrënjësisht qasjen ndaj zbulimit të kancerit”, duke lejuar identifikimin më të hershëm dhe trajtime më efektive.
Në mbi 99% të rasteve, testi përjashtoi saktë praninë e kancerit te personat pa sëmundje, ndërsa kur u kombinua me skriningun ekzistues të gjirit, zorrëve dhe qafës së mitrës, numri i rasteve të zbuluara u rrit shtatëfish.
Megjithatë, shkencëtarët theksojnë se nevojiten studime të mëtejshme për të provuar nëse ky test në fakt ul normat e vdekshmërisë nga kanceri. Profesorja Clare Turnbull nga Instituti i Kërkimeve të Kancerit në Londër tha se provat afatgjata do të jenë thelbësore për të kuptuar përfitimet reale të këtij testi.
Rezultatet e plota do të prezantohen këtë fundjavë në Kongresin e Shoqatës Europiane për Onkologji Mjekësore në Berlin. Ndërkohë, në Angli po zhvillohet një studim trevjeçar me 140,000 pacientë të NHS, rezultatet e të cilit pritet të publikohen vitin e ardhshëm. Nëse testet rezultojnë të suksesshme, NHS planifikon t’i zgjasë ato për një milion persona të tjerë.
Presidenti i Grail, Sir Harpal Kumar, e quajti testin “një mundësi të jashtëzakonshme për të zbuluar shumë më tepër kancere në fazë të hershme dhe për të shpëtuar jetë”.
Megjithatë, ekspertët nga Cancer Research UK paralajmërojnë për nevojën e kujdesit, për të shmangur diagnostikimin e tepërt të rasteve që mund të mos paraqesin rrezik serioz.
Komiteti Kombëtar i Shqyrtimit në Mbretërinë e Bashkuar pritet të vlerësojë rezultatet për të vendosur nëse testi Galleri do të aprovohet për përdorim të gjerë nga NHS.
